बॅटमॅन-डे : २० सप्टेंबर
मुलांनो, तुम्ही बॅटमॅनच्या कॉमिक्स नक्कीच वाचल्या असतील, किंवा त्याच्या रोमांचक चित्रपटांचा आनंद घेतला असेल. जगभरातील लाखो चाहत्यांचा आवडता हा सुपरहिरो म्हणजे बॅटमॅन! दरवर्षी सप्टेंबर महिन्याच्या तिसऱ्या शनिवारी बॅटमॅन-डे साजरा केला जातो. यंदा तो २० सप्टेंबर रोजी साजरा होत आहे. चला तर मग, या निमित्ताने बॅटमॅनच्या काही अद्भुत आणि रोचक गोष्टी जाणून घेऊया.
हुशार – टेक्नो स्मार्ट योद्धा
इतर बहुतेक सुपरहिरोज जादुई किंवा अलौकिक शक्तींमुळे खलनायकांवर मात करतात. पण बॅटमॅनकडे अशी कोणतीही सुपर पॉवर नाही. त्याचे धैर्य, बुद्धिमत्ता, कठोर प्रशिक्षण, वेगळी रणनीती आणि तंत्रज्ञानाचा वापर करण्याची खास कला यामुळे तो विजय मिळवतो. त्याने तब्बल 127 प्रकारच्या मार्शल आर्ट्समध्ये प्राविण्य मिळवले आहे.
८६ वर्षे जुने पात्र
बॅटमॅनला पहिल्यांदा मे १९३९ मध्ये डिटेक्टिव कॉमिक्सच्या २७व्या अंकात जगासमोर आणले गेले. कलाकार बॉब केन यांनी त्याची प्रतिमा साकारली होती, तर त्याची कथा बिल फिंगर यांनी लिहिली होती. आज ८६ वर्षांनंतरही बॅटमॅनची लोकप्रियता तितकीच टिकून आहे.
सर्वत्र गाजलेला
सुरुवातीला तो फक्त कॉमिक्सपुरता मर्यादित होता. पण हळूहळू बॅटमॅनची कीर्ती जगभर पसरली. आता तो फक्त कॉमिक्समध्ये नाही तर चित्रपट, टीव्ही शोज, व्हिडिओ गेम्स आणि अनेक उत्पादनांच्या ब्रँड स्वरूपातही प्रसिद्ध झाला आहे.
फार श्रीमंत आहे बॅटमॅन
बॅटमॅनचे खरे नाव ब्रूस वेन आहे. तो बाहेरून एक साधा उद्योगपती वाटतो. पण तो कॉमिक्सच्या इतिहासातील सर्वात श्रीमंत पात्रांपैकी एक आहे. त्याची संपत्ती अब्जावधी रुपयांत असल्याचे म्हटले जाते. त्याच्या उत्पन्नाचा मुख्य स्रोत म्हणजे त्याची कौटुंबिक कंपनी वेन एंटरप्रायझेस.
अनेक भाषा जाणणारा
बॅटमॅन तब्बल दहा भाषांमध्ये बोलू शकतो. त्यातील सात भाषा – कॅन्टोनीज, स्वाहिली, जपानी, स्पॅनिश, फ्रेंच, इंग्रजी, रशियन आणि इटालियन – तो अगदी सहजतेने बोलतो. त्याला जर्मन आणि व्हिएतनामी भाषाही बऱ्यापैकी अवगत आहेत. याशिवाय तो क्रिप्टोनियन भाषा थोडी तुटक-फुटक पद्धतीने बोलतो.
मदतनीस रॉबिन्स
बॅटमॅनला अनेक सहकारी मिळाले आहेत. डिक ग्रेसन, जेसन टॉड, टिम ड्रेक आणि डॅमियन वेन या पात्रांनी रॉबिनची भूमिका बजावली आहे. प्रत्येक रॉबिनची स्वतःची खास कथा आणि वैशिष्ट्ये आहेत.
गुप्त मुख्यालय – बॅटकव्ह
बॅटमॅनचे गुप्त मुख्यालय म्हणजे बॅटकव्ह. येथे अनेक प्रगत सुविधा आहेत. त्यामध्ये बॅटकंप्युटर आणि बॅटमोबाईलसारख्या खास आणि शक्तिशाली उपकरणांचा समावेश आहे.
गोथम सिटी – बॅटमॅनचे शहर
गोथम सिटी हे ईशान्य अमेरिकेतील एक काल्पनिक शहर आहे. डीसी कॉमिक्समध्ये हे शहर बॅटमॅन, त्याचे मित्र आणि शत्रू यांचे घर म्हणून ओळखले जाते. हे शहर प्रामुख्याने अंधकारमय आणि गुन्हेगारीने भरलेले दाखवले गेले आहे. भ्रष्टाचार आणि गुन्हेगारीमुळे गोथमचे नागरिक त्रस्त असतात.
आशेचा किरण – बॅट सिग्नल
१९४० च्या दशकात गोथम सिटी पोलिसांनी बॅटमॅनला बोलावण्यासाठी बॅट-सिग्नलचा वापर सुरू केला. हा सिग्नल नागरिकांसाठी आशेचे प्रतीक ठरला. संकटाच्या वेळी बॅटमॅनला बोलावण्यासाठी आकाशात चमकणारा हा सिग्नल पाठवला जातो.
अजून काही मजेदार गोष्टी
* बॅटमॅनचा काका फिलिप आहे.
* त्याच्या आईचे नाव मार्था वेन आहे.
* त्याने गुप्तहेरगिरीचे धडे हार्वे हॅरिस यांच्याकडून घेतले.
* बॉक्सिंगचे शिक्षण त्याने टेड ग्रँट (वाइल्डकॅट) यांच्याकडून घेतले.
* कधी कधी त्याच्या सूटवर इंद्रधनुष्याचे डिझाईन दाखवले जाते.
* बॅटमॅनचा आवडता पदार्थ म्हणजे मुलिगाटावनी सूप.
* त्याचा एक दत्तक मुलगा आहे – जारो, जो एका कुपीत ठेवलेल्या स्टारो (विशाल मानसिक समुद्रतारा)चा एक भाग आहे.
मुलांनो, बॅटमॅन हा फक्त सुपरहिरो नाही, तर धैर्य, बुद्धिमत्ता आणि प्रामाणिकपणाचा आदर्श आहे. त्याच्याकडे अलौकिक शक्ती नसल्या तरी त्याने कठोर परिश्रम, प्रशिक्षण आणि तंत्रज्ञानाच्या बळावर खलनायकांवर मात केली. त्यामुळेच तो जगभरातील लाखो चाहत्यांचा *सुपरहिरो* बनला आहे.
या बॅटमॅन-डेच्या निमित्ताने आपणही बॅटमॅनसारखे धैर्यवान, हुशार आणि मदतनीस होण्याचा संकल्प करू या! 🦇